Skipurit

Hagstofan skiptist í fimm svið; félagsmálasvið, fyrirtækjasvið, efnahagssvið, rekstrarsvið og stjórnsýslu og samstarf.

Hagstofunni stýrir hagstofustjóri, Ólafur Hjálmarsson. Starfsmannamál heyra beint undir hann auk rannsóknadeildar, en hún hefur það að meginverkefni að gera þjóðhagsspár. Hagstofustjóri og sviðsstjórar mynda yfirstjórn Hagstofunnar. Staðgengill hagstofustjóra er Elsa Björk Knútsdóttir, sviðsstjóri rekstrarsviðs.

Félagsmálasvið

Á félagsmálasviði starfa tvær deildir að félagsmálatölfræði. Atvinna, lífskjör og mannfjöldi vinnur að hagskýrslugerð um vinnuaflið, lífskjör, félagsvernd, heilbrigðismál, kosningar, stöðu kynja, lýðfræði og mannfjölda. Laun, tekjur og menntun annast hagskýrslugerð um tekjur, laun, launakostnað, menntun, skólamál, menningarmál og fjölmiðla. Hrafnhildur Arnkelsdóttir er sviðsstjóri félagsmálasviðs.

Fyrirtækjasvið

Á fyrirtækjasviði starfar deild um fyrirtækjatölfræði sem vinnur tölfræði um fyrirtæki og atvinnuvegi. Einnig heyrir undir sviðið utanríkisverslunardeild sem sér um söfnun og úrvinnslu gagna um þjónustuviðskipti og vöruviðskipti Íslendinga við útlönd. Rekstur fyrirtækjaskrár til hagskýrslugerðar heyrir enn fremur undir sviðið og er grundvöllur fyrir þá fyrirtækjatölfræði sem unnin er. Unnin er skammtímatölfræði um veltu og starfsmannafjölda eftir atvinnugreinum sem og árleg tölfræði um rekstur og afkomu atvinnugreina. Tölfræði um ferðaþjónustu, umhverfi, sjávarútveg og landbúnað heyrir undir sviðið. Einnig heyrir tölfræði um rannsóknir og þróun í íslensku hagkerfi, sem og tölfræði um nýsköpunarvirkni fyrirtækja, undir sviðið. Böðvar Þórisson er sviðsstjóri fyrirtækjasviðs.

Efnahagssvið

Á efnahagssviði sér vísitöludeild um útreikning vísitölu neysluverðs, vísitölu byggingarkostnaðar, vísitölu framleiðsluverðs og skyldar verðvísitölur. Deildin sér einnig um alþjóðlegan verðsamanburð (PPP) og frágang og útgáfu á niðurstöðum úr rannsókn á útgjöldum heimilanna. Þá vinnur deild um þjóðhagsreikninga og opinber fjármál að framleiðslu-, ráðstöfunar- og tekjuskiptingaruppgjöri þjóðhagsreikninga, gerð ársfjórðungsreikninga, fjármálareikninga og ferðamálareikninga. Einnig vinnur deildin að gerð hagvísa og annast hagskýrslugerð um búskap hins opinbera og um tekjuskiptingu. Björn Rúnar Guðmundsson er sviðsstjóri efnahagssviðs.

Rekstrarsvið

Á rekstrarsviði starfa þrjár deildir, fjármáladeild, gagnasöfnunardeild og upplýsingatæknideild. Fjármáladeild sér um rekstur, bókhald og fjármál. Upplýsingatækni annast rekstur og þjónustu vegna tölvukerfa. Deildin sér einnig um hönnun, forritun og rekstur á sérsniðnum hugbúnaðarlausnum. Gagnasöfnun vinnur, eins og nafnið gefur til kynna, að gerð úrtaksrannsókna og annarri gangnasöfnun. Elsa Björk Knútsdóttir er sviðsstjóri rekstrarsviðs.

Stjórnsýsla og samstarf

Undir sviðið heyra samskipti, almannatengsl, útgáfumál, vefur, alþjóðasamstarf, aðferðafræði, gæða- og öryggismál, persónuverndarmál, umsýsla sérvinnslubeiðna, samstarf við aðra framleiðendur hagtalna, þjónusta við rannsóknarsamfélagið og umsýsla umsókna um aðgang að trúnaðargögnum. Ólafur Arnar Þórðarson er sviðstjóri stjórnsýslu og samstarfs.